نماز جنازہ میں کتنے سجدے؟

اسی 22 دسمبر کو میرا ایک عزیز دوست فوت ہو گیا ہے۔ مرحوم بنیادی طور پر گوجرانوالہ پاکستان سے تھا اور اپنی شہریت ترک کر کے ہانگ کانگ کا شہری تھا۔ چین کے اس شہر (شانتو ) میں ہم دونوں گزشتہ 9 سال سے اکٹھے رہ رہے تھے۔

مرحوم کی عمر 35 سال سے کم، صرف ایک بچے کا باپ اور چھ فٹ سے زیادہ قد کا مالک، بالکل تندرست اور صحتمند نوجوان تھا۔ مرحوم کی ناگہانی موت پر صدمے سے زیادہ حیرت ہوئی۔ غم اپنی جگہ مگر اس خلاء کیلئے دل بہت ملول ہوا ہے۔

ایسی جگہ پر جہاں دو یا تین لوگ ہی ہم زبان ہوں وہاں ایسی رفاقت چھوٹ جانے کا تصور کرنا ہی ہول آنے جیسا ہوتا ہے۔ ایسے لگتا ہے جیسے ایک آدمی سارے شہر کو ویران کر گیا ہے۔

ہر انسان میں اچھی بری کئی خوبیاں اور خامیاں ہوتی ہیں۔ مرحوم کی سب سے بری خامی اس کا مجھے رات گئے فون کر کے یہ یقین دلانا ہوتا تھا کہ بھائی اس شہر میں آپ کو کوئی تکلیف پہنچانے آئے گا تو میری لاش سے گزر کر آئے گا۔ انا للہ و انا الیہ راجعون، سب نے مرنا ہے۔ اللہ سب کی عاقبت اچھی کریں۔

مرنے والے کیلئے ہم اپنی عقیدت کا کیسے اظہار کریں؛ سوئم، قل، جمعراتیں اور چالیسواں تو اب کھانے پینے کے مواقع اور رسومات ہو کر رہ گئے ہیں جن میں خاندانی ناک بچانا ایصال ثواب سے زیادہ بڑا کام ہوتا ہے۔ کوئی صدقہ جاریہ کیلئے کچھ کر دے تو اچھا ورنہ سب کچھ نمود اور دھوکا۔

رہ جاتی ہے ایک نماز جنازہ، جس میں آپ کی خلوص سے کی ہوئی دعا مرحوم کی منزلیں آسان کرتی ہے مگر عیدین کی طرح اس شاذ موقعے پر لوگوں کی آئیں بائیں شائیں ان کی مذہب دوستی کو عیاں کر رہی ہوتی ہے۔ ایسے ایسے لطیفے بنتے ہیں کہ عقل دنگ رہ جائے۔ روشن خیال لوگ تو رہے ایک طرف، بڑے بڑے طرم خاں اور باریش بھی اس نماز سے نابلد ہونق بنے کھڑے ہوتے ہیں۔

دیکھیئے، مرنے والا آپ کا جگر گوشہ، آپ کے جگر کا ٹکڑا، آپکا محبوب، آپ کی چھاؤں، آپ کی جنت، آپ کا رفیق، آپ کا کندھا یا آپ کا پیارا یار بھی ہو سکتا ہے۔ ایسے موقعے پر اسے یہ شرعی ٹرائیبیوٹ پیش کرنے کیلئے آپ کو اگر کچھ نہیں آتا تو آپ کی ساری قرابت داری دھوکا تھی کیا؟ نماز جنازہ کوئی بڑی بات نہیں اگر ہوا نا بنائیں تو۔

آئیے اس بارے میں کچھ سیکھتے ہیں:

1: چار تکبیروں کے ساتھ پڑھی جانے والی اس نماز میں کوئی سجدہ یا رکوع نہیں ہوتا۔ ویسے تو یہ فرض کفایہ ہے، بعض لوگوں نے پڑھ لی تو سب کی ہو گئی، اگر کسی نے بھی نہ پڑھی تو سب گنہگار۔

2: پہلی تکبیر کے بعد ثناء  پڑھتے ہیں، اگر جنازے والی مخصوص ثناء نہیں آتی تو نماز والی بھی ٹھیک ہے۔

3: دوسری تکبیر کے بعد درود شریف  پڑھتے ہیں، جنازے والا مخصوص درود نہیں آتا تو کوئی بات نہیں، نماز والا درود ابراہیمی بھی ٹھیک ہے۔

4: تیسری تکبیر کے بعد بالغ مرد و عورت دونوں کی میت کیلئے ایک ہی دعا پڑھتے ہیں، اس دعا کو یاد کر لیں، پندرہ منٹ لگیں گے اور آپ ساری عمر کیلئے سرخرو رہیں گے۔ اگر کوئی دعا نا آتی ہو تو یہ والی اتنی سی دعا (اَللّٰهُمَّ اغْفِرْلَنَا وَلِوَالِدَيْنَا وَ لِلْمُؤْمِنِيْنَ وَالْمُؤْمِنَاتِ) بھی کافی ہے یہ پڑھ لیں۔

5: چوتھی تکبیر کے بعد امام چند لمحے خاموش کھڑا رہتا ہے اور پھر سلام پھیرتا ہے، اس کے ساتھ آپ بھی سلام پھیر دیتے ہیں۔

نابالغ بچوں کیلئے دعا نہیں ہوتی بلکہ ان کو ہم اپنے کیلئے فرط، اَجر و ذخیر اور شفاعت کرنے والا اور مقبولِ شفاعت بن جانے کیلئے اور اپنے آپ کیلئے دعا  کرتے ہیں۔ بچیوں اور بچوں کیلئے دعا کا صیغہ محض تذکیر و تانیث کے معمولی فرق والا ہوتا ہے۔

بس جی، اتنی سی بات اور یہ ہے نماز جنازہ، اللہ کے حضور آپ کے دل کی آواز آپ کے عزیز کی بخشش کیلئے، جس کا وہ اب محتاج ہے۔

  دیکھیئے، دنیا مکافات عمل ہے، آج وہ مرنے والا آپ کی دعا کا محتاج ہے تو کل آپ ہونگے۔ نا صرف بذات خود، بلکہ اپنے بچوں اور دوستوں کو بھی ترغیب دیکر یہ سب کچھ یاد کرا دیں۔ تاکہ آنے والے کل کو کوئی تو ہو جو آپ کیلئے ہاتھ اٹھا کر آپ کیلئے دعا کر سکے۔