مہمان خصوصی

شانتو (Shàntóu -  Chinese:  汕头) مسلمانوں کی آبادی کے لحاظ سے ایک بانجھ شہر ہے۔ یہاں پر ایک بھی پیدائشی یا رجسٹرڈ مسلمان ہوتا تو پچھلے سال یہاں کی لوکل گورنمنٹ مسجد کیلئے ایک پلاٹ دینے پر آمادہ ہو گئی تھی مگر وائے حسرت! شہر میں ایک وقت میں دو سو سے زیادہ چینی مسلمان آباد رہتے ہیں۔ اس کی وجہ کچھ اور نہیں چین کے دوسرے مسلمان اکثریتی صوبے لانچو کی مشہور سوغات ہاتھوں کی بنی ہوئی تازہ سویوں بنا کر بیچنے والے ریسٹورنٹس کے مسلمان مالکان اور عملہ ہیں جو شانتو کو اپنا دوبئی بنا کر ادھر آباد ہیں۔

جادوئی ہاتھوں سے سیکنڈوں میں بیسیوں اقسام کی موٹی، باریک یا چپٹی سویاں بنانے کے یہ ماہر لوگ،  لانچو سے بھلے دوگنی قیمت پر یہاں شانتو میں یہ نوڈلز فروخت کریں مگر یہاں کے لوکل کھانوں سے پھر بھی نصف قیمت اور سستے ہیں۔ یہ نوڈلز پورے چین میں ان لوگوں کی مناسبت سے لانچو لامیان کہلاتی ہیں۔  ان سب لوگوں کے ریسٹورنٹ  کے ماتھے پر لگا "حلال - الاطعمہ الاسلامیہ" والا سائن بورڈ اور ریسٹورنٹ کے اندر دیوار پر لگا باتصویر  مینیو ایک جیسا بلکہ ایک جیسا ہی چھپا ہوا (لانچو سے چھپوا کر لاتے ہونگے) ہوتا ہے ان کی سب سے  زیادہ بکنے والی ڈش  تو  وہی لانچو بیف نوڈلز ہوتے ہیں  مگر باقی کے کھانے جیسے  ڈمپلنگ، باؤ میان اور چھاؤ میان بھی کھانے والے ہوتے ہیں۔

لانچو والوں کا دیواری مینیو

لانچو  کا صوبہ شانتو سے بذریعہ بس کم از کم  پینتیس گھنٹے کی دوری پر ہے اس لیئے  یہ لوگ بھلے یہاں پر سالوں سے مقیم ہیں مگر اپنے آپ کو  آج بھی  پردیسی سمجھتے اور پردیسیوں جیسا رہن سہن رکھتے ہیں۔ سال دو سال میں ایک آدھ بار واپس اپنے صوبے میں جاتے ہیں اور مہینہ دو مہینے چھٹیاں گزار کر یا  آرام کر کے واپس آجاتے ہیں، ان چھٹیوں میں ان کے بچوں کی شادیاں اور دوسرے فرائض سے سبکدوش ہوا جاتا ہے۔

بچیوں کی شادیاں کم سنی میں ہی کر دیتے ہیں۔ بچیوں کے رشتے ان کی شکل و صورت کے اعتبار سے نہیں ، کام کرنے کی لگن اور صلاحیت کے اعتبار سے  ہوتے ہیں۔ ادھر شادی ہوئی ادھر دولہا دلہن کو ایک نیا ریسٹورنٹ کھول کر چلتا کر دیا گیا۔ مرد ہاتھوں سے نوڈلز بناتا ہے اور لڑکی سارا دن چولہے کے سامنے کھڑی ہوکر باقی کے کھانے تیار کرتی ہے۔ محنت رنگ لاتی ہے اور دو تین سالوں میں یہ دلہن خاوند کو تین چار بچے اور ایک عدد نئی کار بھی لیکر دیدیتی ہے۔ کار کا استعمال اس خاندان کیلئے کیا ہوگا کے بارے میں  کچھ کہنا محض قیاس آرائی ہی ہوگی کیونکہ سال کے تین سو پینسٹھ دن کام کرنے والے، ریسٹورنٹ کے میزین فلور پر رہائشی، صبح سےرات گئے تک بلا تکان محنت اور محبت سے کام کرنے والے  یہ لوگ کب اپنی ذات کیلئے وقت نکالتے ہونگے کو میں گذشتہ کئی برسوں سے نہیں دیکھ پایا۔

لانچو کے ہر شہر میں مساجد کی بہتات ہے، وہاں رہن سہن اور کھانے پینے کی اشیاء  بہت سستی، اور ماحول اسلام دوست ہے۔ شانتو میں بھی ان لوگوں کا اسلام سے تعلق جیسا بھی ہو مگر جمعہ اور عیدین پران  کی اسلام دوستی (ان کا اجتماع اور اہتمام) دید کے قابل ہوتی ہے۔ اکثر لوگ حفاظ ہیں اور وقت پڑے تو سارے کے سارے ہی امام اور مؤذنین ہیں۔ میں جب یہاں پر نیا نیا آیا تو مسجد کی تلاش  میں میرا  واسطہ ان لوگوں سے پڑا۔ مسجد کیا تھی، لفٹ سے محروم  ایک سالخوردہ عمارت کی ساتویں منزل پر چھوٹے سے ایک کمرے کے فلیٹ پر مشتمل تھی۔ اس مسجد کا کرایہ اور خرچہ یہ ریسٹورنٹ والے لوگ برداشت کرتے تھے۔ میرے جیسا آدمی اوپر پہنچ کر نماز نہیں آرام کی سوچتا تھا باقیوں کے دلوں پر کیا بیتتی ہو گی اس کا اندازہ خود لگا لیجیئے۔ ان کی سادہ لوحی کا یہ عالم تھا کہ افطار و سحر کیلئے اپنے صوبے لانچو فون کر کے اوقات پوچھتے تھے۔تو عید اور رمضان کا تعیین تو یقینا وہاں کے چاند کے حساب سے ہی ہوتا تھا۔

میں کیونکہ سعودیہ کی ایک کمپنی کے کام کے سلسلے میں یہاں آیا ہوا تھا اس لیئے میرے  رابطے سعودیہ کے مخیر لوگوں سے تھے۔ مسجد کی حالت جیسی تھی ویسی کی بنیاد پربتانا ہی اثر کر گیا اور مجھے فنڈز مل گئے کہ مسجد کو گراؤنڈ فلور پر نہیں تو کم از کم پہلی منزل تک ضرور لاؤں، جگہ کشادہ ہو، عمارت صاف ستھری ہو، وضو کی سہولت ہو، ایئر کنڈیشن ہو وغیرہ وغیرہ۔  فنڈز کی ایسی ریل پیل کہ ہر شخص کہتا اگلی بار ہمیں موقع دینا۔ میں نے مسجد کے متولی انکل صالح کو کہا مسجد کو نیچے منتقل کرو پیسوں کا کوئی مسئلہ نہیں ہے اور پھر چند ہی دنوں میں ہم نئی جگہ منتقل ہوگئے۔ عیدین کی نماز کیلئے کیونکہ آس پاس کے چھوٹے شہروں کے لوگ بھی شانتو کا رُخ کرتے ہیں ۔ اس کیلئے انکل صالح نے باقاعدہ لوکل گورنمنٹ سے دریا کے کنارے ایک جگہ کا پرمٹ لے رکھا ہے جہاں کھلے میدان میں  نماز پڑھائی جاتی ہے۔ انکل صالح میری بہت زیادہ عزت کرتے ہیں، انہیں جب بھی کچھ اخراجات درپیش آتے مجھے کہتے اور میں انتظام کرا دیتا۔ یقینی بات ہے ہر ریسٹورنٹ والے کو میرا بتایا گیا ہوگا کہ کہ  وہ مخیر حضرات والا ٹوٹکا میں ہی ہوں۔ میری عزت افزائی کیلئے مجھ سے چندایک  بار اذان دلوائی گئی تو ایک آدھ بار مولوی صاحب کی عدم موجودگی میں مجھ سے جمعہ بھی پڑھوایا گیا (حیران نا ہوں، مسجد میں خطبے کی کتاب رکھی ہوئی ہے کوئی بھی پڑھ کر خطبہ دے سکتا ہے اور جمعہ پڑھا سکتا ہے)۔

ہماری شانتو مسجد میں جمعہ کے علاوہ کسی اور نماز کا تو کوئی  انتظام نہیں مگر رمضان شریف میں تراویح  ضرور پڑھائی جاتی ہے۔ پہلا عشرہ تو محض تراویح ہوتی ہیں مگر دوسرے عشرے سے ان لوگوں کی ایک دوسرے کو دعوتیں بھی شروع ہو جاتی ہیں۔ ہر تراویح کے بعد کوئی ایک سب کو اپنے ساتھ لیکر جاتا ہے۔ ان کی یہ دعوت ایک قسم کا فیمیلی ایونٹ ہوتی ہے۔ اکثر شریک لوگوں کے بیوی بچے بھی ادھر پہنچ چکے ہوتے ہیں۔ کیونکہ سب کا کاروبار کھانا پکانا ہی  ہے، اس لیئے یہ دعوت گویا ایک دوسرے کو اپنے فن سے مات دینے کا مقابلہ بھی ہوتی ہے۔ بیسیوں کھانے  محنت اور محبت سے بنائے جاتے ہیں تو کھانے والے بھی تعریف میں کنجوسی نہیں کرتے، اتنی ہی چاہت سے کھاتے اور تعریف کرتے ہیں۔ یہاں یہ کہنا ضروری نہیں کہ میں ہر جگہ معزز مہمان خصوصی کی حیثیت سے موجود اور راجہ اندر بنا ہوا ہوتا ہوں۔

پرسوں تراویح پڑھ کر باہر نکلنے لگا تو ایک صاحب نے بازو تھام لیا، میں سمجھ گیا کہ آج کہیں دعوت ہوگی۔ انکل صالح  مسجد کو تالا لگا کر باہر آئے تو مجھے کہا تم میرے ساتھ چلو گے جس پر مجھے کیا اعتراض تھا۔ انکل صالح کے بیٹے عبدالحکیم کی چم چم کرتی  بڑی سی کار نیچے میرے انتظار میں کھڑی تھی، مجھے فرنٹ سیٹ پر بٹھایا گیا اور کار مطلوبہ ریسٹورنٹ پر جانے کی بجائے انکل کے ریسٹورنٹ کی طرف چلدی جہاں دیگر لوگ تو دعوت کے مقام پر پہلے ہی جا چکے تھے مگر انکل صالح کی گھر والی اپنے پوتے پوتیوں اور نواسے نواسیوں کے ساتھ انتظار کر رہی تھی۔ یہ کوئی چھ بچے بچیاں ہونگی ان میں سے سب سے  بڑے کی عمر پانچ سال سے کم ہوگی۔ یہ سارے چینی بچے لگتا تھا کہ پری سکول کنڈر گارٹن جاتے ہونگے کیونکہ انہوں نے دادا اور دادی سے لپٹ کر،   لے میں گا گا کر،  اور سُر میں تالیاں بجا کر بچوں والی نظمیں  پڑھنا شروع کردی تھیں۔ انکل نے ایک دو بار تو سنا مگر پھر ڈانٹ کر کہا یہ نہیں گاؤ،  ذکر کرو۔ بس پھر کیا تھا سب بچوں نے بڑے نظم و نسق کے ساتھ بہت ہی خوبصورتی سے کلمہ طیبہ پڑھا۔ ان چینی بچوں کا لب و لہجہ اور ادئیگی ایسی تھی کہ میں حیرت زدہ ہو ہی رہا تھا کہ انہوں نے کلمہ پڑھ چکنے کے بعد ایمان مجمل پڑھنا شروع کردیا۔

میرا دماغ یکدم سے چکرایا، معانی اور مفہوم کی اور بات ہے میں یہ اچھی طرح جانتا ہونگا ، وقت پڑے تو یہ ساری صفات ترتیب سے نہیں تو کم از کم ویسی ہی سنا بھی دونگا۔  مگر  بات یہ تھی کہ یہ  کلام مجھے پڑھے ہوئے کتنا عرصہ ہو گیا تھا سوچ کر ہی مجھے ہول سا اٹھا۔ میرے اپنے گھر میں بھتیجے بھتیجیاں ہیں، بھانجے بھانجیاں بھی ہیں، کیا میرے بھائی بہنیں بھی اپنے بچوں کو یہ سب کچھ یاد کراتے ہونگے سوچ کر میرا دل خراب ہونے لگا۔ میں نے جلدی  سے بچوں کے ساتھ مل کر دہرایا کہ کیا واقعی میں ان الفاظ اور کلمات کا اقرار اپنی زبان سے کر بھی سکتا ہوں  کہ نہیں۔ دل مطمئن نا  ہوا تو  موبائل سرچ پر ایمان مفصل اور ایمان مجمل لکھا، امیج سرچ کرکے سیو کیا اور پڑھ کر دہرانے لگا ۔ ہماری کار کب ریسٹورنٹ پہنچی کے بارے میں جاننا اب میرا مقصد نہیں تھا نا ہی مجھے وہ لوگ جو اسپیشل کرسی میرے لیئے بڑھا کر مجھے پہلے بٹھانے کا شرف حاصل کرنا چاہتے تھے محسوس ہو رہے تھے۔ مجھے تو لاشعور سے بس ایک ہی آواز آ کر میرے دماغ میں ہتھوڑے برسا برسا کر کہہ رہی تھی: "او جھوٹے مہمان خصوصی "