خیر باقی ہے

اس بار میرے ساتھ  پاکستان میں یہ درج ذیل واقعہ   پیش آیا  جو اس بات کا ثبوت ہے  کہ شر  چاہے جتنا  بھی نمایاں نظر آتا ہے خیر اس کے نیچے دبا نہیں ، اور  ابھی بھی اپنے پورے آب و تاب کے ساتھ باقی ہے۔

ہوائی سفر کے دوران جس قدر سامان کو جمع کرانے کی سہولت ہوتی ہے،  سے زیادہ سامان کو بیک پیک میں یا  دستی ٹرالی بیگ میں ایڈجسٹ کرنا میرا پرانا مشغلہ ہے،  اس کیلئے میں پھر اس بات کا خیال نہیں رکھتا کہ  یہ سامان   بیک پیک کے شایان شان ہے بھی یا نہیں،  بس وزن کا خیال رکھتا ہوں کہ کیسے زیادہ سے زیادہ  ادھر  کھپا لیا جائے۔ پچیس اگست کو صبح اُٹھ کر نماز و تلاوت کے بعد کچھ اذکار مسنونہ سے فارغ ہو کر میں نے ایئرپورٹ جانے سے پہلے اس بات کو ممکن بنایا کہ وہاں کا عملہ میرے سامان کیلئے نا تو مجھ پر ترس کھائے اور نا ہی کوئی احسان کرے جس میں میں کامیاب رہا۔

اسلام آباد پہنچ کر خرم ابن شبیر کے بار بار میسیج  آنا تو فون آن کرتے ہی شروع ہو گئے تھے جبکہ ٹیلفون کا لا متناہی سلسلہ جہاز سے اترتے ہی  شروع ہوگیا۔ میں اپنے پروگرام کے مطابق سب سے پہلے سیدھا ڈائیوو اڈے گیا جہاں میرا مقصد بیک پیک کو گجرات کے احباب (بشمول بلال بھائی، بھائی طاہر بٹ صاحب، بھائی غلام عباس مرزا اور جناب برادرم عبدالستار صاحب وغیرہ )  کے پاس جانے اور رات بھر وہاں قیام کرنے کے دوران قابل استعمال چیزوں سے بھرنا اور باقی کا سامان ملتان کیلئے  بُک کرانا تھا۔

اڈے پر پہنچ کر میں نے لاؤنج میں تین کرسیوں پر اپنا سامان رکھا اوراگلے مرحلے کی تیاری شروع کی۔ اڈے کی محدود جگہ اور بے شمار مسافروں کی آمد و رفت میں ماحول سے لاتعلق بن کر بیٹھ رہنا ،  یا اپنا سامان کھول کر چیزیں ادھر اُدھر آسانی سے کرلینا  ممکن نہیں  تھا۔  جب کہ اس دوران پانچ چھ خواتین پر مشتمل ایک خاندان میرے سامنے والی کرسیوں پر بیٹھنے کیلئے آیا، معمر خواتین بیٹھ پائیں جبکہ جوان خواتین جگہ نا ہونے کی وجہ سے کھڑے ہونے پر مجبور تھیں،  ان کے ساتھ ایک تین یا چار سالہ بچی کو  میں نے پیار سے دیکھا، ہاتھ ہلا کر مسکرایا۔ جبکہ دوسرے ہی لمحے ان کو اپنی کرسیاں پیش کرنے کیلئے   فٹافٹ اپنا   سامان واپس بکسوں میں انڈیلا ، ان لوگوں  کو اپنی کرسیوں پر بیٹھنے کا اشارہ کیا اور اڈے کے اندر بنی عارضی مسجد کی طرف  چل پڑا۔ یہاں میں نے سب سے پہلے لیٹ کر اپنی کمر سیدھی کی،  پچھلے آٹھ دس گھنٹوں سے جاگرز میں قید قدمین  کو راحت ملی تو اور بھی سکون آ گیا۔ دس یا پندرہ منٹ بے سُدھ پڑ کر آرام کرنے کے بعد اُٹھ کر چائنا ایئرپورٹ سے  خریدے ہوئے پانی کی بوتل کو  آرام سے کھول کر پیا، پھر گجرات کیلئے ساتھ لینے اور  ملتان بکنگ کیلئے چھوڑنے والا سامان علیٰحدہ  کیا، اور جب کرنے کیلئے کچھ نا رہا تو سوچا اب اُٹھ کر سامان  بک کرایا جائے، اور  ساتھ لیئے جانے والا سامان اٹھا کر یہاں سے خرم بھائی سے ملنے کیلئے کوچ کیا جائے۔

دونوں ہاتھوں سے  ایک ایک ٹرالی بیگ کھینچتے ہوئے اور  بیک پیک کو پشت پر ڈالے،   میں اڈے میں پر بنی اونچی سلوپ پر چڑھ  کر باہر نکلنے کی کوشش کر ہی رہا تھا کہ ایک دس بارہ سال کا بچہ اپنی  پھولی ہوئی سانس کے ساتھ بھاگتے ہوئے میری طرف آیا اپنے پیچھے آتے اپنے  والدکو میری طرف اشارہ کرتے ہوئے بولا؛ ابو یہ ہے وہ آدمی۔

میں نے ان دونوں باپ بیٹوں کو پہلے کبھی بھی نہیں دیکھا تھا، معاملہ   ناقابل فہم تھا اس لیئے  میری حیرت اپنی جگہ تھی۔ بچے کے والد نے آتے ہی ادب کے ساتھ مجھ سے مصافحہ کیا اور پھر بولے' شاید آپ کا موبائل گُم ہو گیا ہے؟ میں نے جلدی سے جیبیں ٹٹولیں ، موبائل کو نا پا کر  اُن کی اس بات سے پورا اتفاق کیا ۔ صاحب بولے گھبرائیے نہیں آپ کا موبائل ہمارے پاس ہے، بس آپ کو یہ کرنا ہے کہ میرے موبائل سے اپنا  نمبر ملائیے، اور اپنا موبائل لے لیجیئے۔

صاحب نے تصدیق کے بعد مجھے میرا  آئی فون فور موبائل لوٹاتے ہوئے جو کہانی سُنائی وہ یوں تھی کہ  تقریباً آدھا گھنٹا پہلے جب میں یہاں اپنا موبائل فون چھوڑ کر گیا تھا  تو انہوں  نے اُسے اپنے قبضے میں لیکر  ہر طرف تلاش کیا۔ اڈے سے نکلتی ہر بس میں دیکھا کہیں کوئی ایسا مسافر نکل نا جائے جو اس موبائل کا مالک ہو۔ بعد میں لاؤنج میں بھی  کئی بار اعلان کرایا گیا۔ اس ہوش رُبا تفصیل سے جو بات سامنے آ ئی تھی وہ یہ تھی کہ انہوں نے میرے اس فون کو مجھ تک پہنچانے کیلئے  واقعی اتنی سخت محنت کی تھی۔  فون کے مالک شخص کا خاکہ اور پہنے ہوئے کپڑے اور کپڑوں کا رنگ اُس چار سالہ بچی نے فراہم کیا تھا جسے میں نے پیار سے دیکھا اور ہاتھ ہلایا تھا۔

فون لیکر میں نے شکریہ ادا کیا جو لفظوں میں ناممکن تھا تاہم اتنا اعتراف جو کر پایا وہ یہ تھا کہ اللہ پاک آپ خوش رکھے آپ امانت کو حقدار تک پہنچانے کی روایت کے زندہ امین ہیں۔ اللہ پاک آپ کو اجر دے  ۔

شام کو میں نے ان صاحب کا وہ نمبر تلاش کیا جو میرے موبائل پر تصدیق کیلئے آیا تھا سے انہیں تحریری شکریہ کا پیغام  بھیجا جس کے جواب میں ان کا کہنا تھا کہ وہ کوشش کرتے ہیں کہ اپنے بچوں کیلئے ایک اچھی مثال بنیں اور اُن کے بچے آئندہ کیلئے ایک اچھے شہری اور اچھے راست باز مسلمان بنیں۔ اللہ ان کا حامی و ناصر ہو۔

میرا موبائل فون کافی پرانا  ہو چکا ہے تاہم ایسے معاشرے میں جہاں اس سے کئی گنا کم قیمت موبائل کو چھیننے کیلئے بندہ پھڑکایا جا  رہا ہو ، ابھی بھی کافی قیمتی ہے اور ایسے فون کو انتہائی محنت کے ساتھ، اپنی ذات کو بھلا کر، اپنے سفر کو مؤخر کرکے مالک کو تلاش کرکے لوٹانا اس بات کی روشن دلیل ہے کہ خیر ابھی باقی ہے۔